2018年5月13日 星期日

女兒, 無論妳選擇如何, 爸爸媽媽茶々都支持妳 !

今天是母親節, 選擇在這天發這篇文章是想說任何的父母都希望自己的孩子留在身邊, 但是又希望孩子生活得開開心心, 所以如果孩子選擇自己的人生要怎樣行, 只要是正確的, 即使要離開, 雖然捨不得也要放手, 給她過自己認為適合的生活.

畢業了, 女兒決定留下來在東京生活, 在她在找工作的時候, 老公說常常祈禱希望她找到, 到了真的落實長工時他覺得很失落, 人就是這樣矛盾.

其實這個決定是不是在廿年前第一次帶她去日本時候已經種下來的嗎? 話說1998年我帶同老公與女兒重踏上闊別多年的日本, 那時即使是東京都覺得陌生, 第一天到達女兒水土不服嘔吐大作迫得在東京留多了一天, 第三天無論如何都要坐火車到廣島, 早上七時外出找早餐吃, 但是一來不懂找, 二來那時日本的店舖開得比較遲, 結果只是買了麵包回酒店吃, 那時女兒便一路扭計發脾氣, 當我們預備離開酒店的時候她就是不肯走, 當時很氣憤地拋低護照給她拿著, 叫她自己留下我們就出房門, 一般來說六七歲的小朋友這時一定會哭著追出來, 但我們到達電梯大堂也不見有動靜, 於是返回房只見她仍然拿著護照和背囊不動地坐在床上, 最後投降的當然是我們, 這是否意味著總有一天她會自己留下來 !

還有一件事我直至今年三月旅行期間才問她, 當年她還在小學階段我開始學日文, 她升上中學後初時是我教她簡單的五十音和少許文字, 中學未畢業她已經除了上學外更一邊在日文學校學習日文, 今次我就是問她如果我沒有讀日文的話她會否行這條路, 她的回答是都可能會, 但是可能沒那麼早, 所以一切都好像是互相影響著.

2014年秋, 一場運動改變了很多年輕人的一生, 運動結束後的挫敗感與無力感充斥在年輕人的世界, 積極的選擇將自己投入更多繼續爭取, 相信不少人是選擇逃離這地方, 重新建立自己的新生活, 記得運動開始不久女兒已經與同學到金鐘, 但是結果雞蛋還是敵不過高牆, 那時她開始思想自己的將來, 毅然放棄在香港的工作到日本去"工作假期", 完結後繼續留下來充實自己, 這樣地過了三年.

面對著這片土地人心不斷沈淪, 制度不斷崩壞, 每日聽到的是似是而非的歪理, 指鹿為馬的言論, 小人當道的時勢, 離開未嘗不是一件好事, 不過始終是寄人籬下, 有得選擇沒有人會甘心離開自己土生土長的地方, (就如她初到日本工作時都曾經被欺負過, 猶幸後來遇到一位她尊稱為 "おかあさん"的日本媽媽, 開始她在日本的快樂生活), 但是現在是時候死心, 香港的未來是不屬於她們這一代的年輕人. 君不見我們這個政府常常都叫年輕人北上找工作, 去大灣區居住, 而同胞就南下找緊香港的機遇, 與其這樣倒不如自己尋找自己喜歡的路.

現在她畢業了, 在東京有自己的小天地, 找到工作, 還有有關心她的人在那裡, 做父母的都應該放下這擔子, 放手讓她自己掌握自己的人生.



24 則留言:

  1. 對於香港的現況好有同感,但在没有能力的情況下只好繼續留下
    反而看到你們拋下䕶照給女兒那段文字,不知為何有種酸流流的感覺

    回覆刪除
    回覆
    1. 我諗你會明白我地當時既心情,要趕火車但係用盡所有方法佢都係扭計,只有掉低本護照同佢講,你咁鍾意喺度就自己留喺度,可能呢句說話就深深入咗佢心裡面XD

      刪除
  2. 始終都有離開妳嘅一日,不過佢就唔係香港
    但係家下機票咁抵都無所謂啦..
    聽聞係日本生活並不比香港好好多...遲下妳問下佢喇...

    回覆刪除
    回覆
    1. 係呀, 其實就算喺香港要為事業拚搏都未必會日日見住, 好多工作都要返內地.
      而家好彩有廉航所以都可以飛密啲.
      佢喺日本生活咗三年好多嘢已經習慣咯, 佢都話而家住嗰度雖然遠啲但去首都圈都係半粒鐘, 地方雖然唔係好大但係總比香港住既環境好.

      刪除
  3. 你我都係同一代嘅父母,你嗰種心情我完全明白,依代青年係好有性格,想留又留唔住,想推又推唔走,凡事都要揀自己喜歡的去做,無得勉強,好彩嘅係佢哋遇著我哋依一代思想開通嘅父母,响無生活壓力下都隨得佢哋喜歡。人生係佢哋嘅,就由得佢哋自己去選擇自己嘅路,唔好去擔心,好好享受下兩口子在香港嘅生活,得閒去日本探下佢順便玩下囉...

    回覆刪除
    回覆
    1. 絕對同意, 佢地呢代唔同我地以前多少都要為屋企幫補生計, 我地呢代但求佢地自己照顧到自己已經安心, 唔會強求有啲乜回報如果有就係 bonus.
      我呢就好放心, 但係佢老豆就好多時喺屋企整吓呢樣嗰樣就會話唔知個女呢樣嗰樣識唔識搞噃.

      刪除
    2. 絕對同意,我都但求個仔可以自己攪得掂自己,唔駛我點幫已經阿彌陀佛了,宜家香港生活艱難,唔想加重佢負擔,間中請我食餐飯已滿足,有其他回報就當bonus。

      放心喇,人係要去適應環境,當遇到困難佢哋自然會有辦法去解決。

      刪除
    3. 係喇, 我諗而家冇乜人會要求仔女出身要將份人工俾幾多屋企, 佢地搞掂到已經心滿意足, 話晒而家衣食住行少個錢都唔得 :(

      刪除
  4. 真係好明你心情,我覺得留日本還好,日本近,大家探大家都容易,
    如果個女同我講要去十個八個鐘飛機才到的地方,我相信個感覺更加人間地獄
    我姨個仔就係,去左歐洲打工最拿到居留權,表明會在果度落地生根,
    我姨非常失落,但香港宜家如此環境,根本諗唔到用咩理由叫佢留香港,
    長遠黎講自己d孫可以唔洗stay香港呢個鬼地方係好事...不過佢呢代佢自己呢層要犧牲下...

    回覆刪除
    回覆
    1. 我都覺得日本算好, 可以藉口探親去旅遊 :D
      好似老公個妹去咗意大利要去探佢談何容易, 佢嗰便有頭家返黎又唔會太密所以見面機會都好少, 好彩之前佢叫我個女過去冇成事.
      而家香港既情形點樣可以留住年輕人既心, 佢搵到可以容得下佢既空間俾佢試吓未嘗唔係甚麼壞事呢.

      刪除
    2. 莫講話留住年輕人個心啦,我地呢一代人,退休都唔想在香港,我同老公甚至同d同輩朋友傾計講邊度退休,香港完全唔on list,我成日同老公講退休去沖繩/泰國lol 物價又低番香港又近(台灣天災太多lol)

      刪除
    3. 哈哈,政府叫我地退休去大灣區住喎XDDD
      政府係好希望我地呢啲受殖民地時代教育啲人早走早著,等佢對千禧後出世既BB全面洗腦加埋每日來港溝淡香港人以後就可以為所欲為。

      刪除
  5. 我個仔喺日本住咗年半,本來佢做part time間公司叫佢留低做長工,不過最終佢都決定返香港。

    回覆刪除
    回覆
    1. 或者你個仔覺得日本生活唔適合, 不過可以喺另一地方生活過始終係一個好既經驗.

      刪除
    2. 每個人嘅際遇都唔同,同一個地方有人喜歡亦有人唔喜歡,反正都體驗過,佢要返嚟就由得佢返嚟算了

      刪除
    3. 正如我地呢啲視日本為鄉下既人, 好多人不以為然呢.

      刪除
    4. 曾經在網上睇過有些人講到日本旅遊和在當地生活或工作嘅感覺係好唔同,而且當地人對待依兩類人嘅態度亦有分別,所以有些人去玩會好喜歡,反而生活和工作就未必會喜歡,因為有時日本人做事嗰種方式唔係香港人接受到

      刪除
    5. 香港公務員做事既僵化而日本人係有過之而無不及,個女初期同啲公務員打交道直情嘔血,佢話同佢地講嘢激到喊晒,不過佢漸漸都接受到。

      刪除
    6. 喺嗰邊生活費高,每日除咗返學就係返工,賺埋都唔夠生活費,我每個月都仲要畀錢佢。就算轉長工,人工都喺緊夠開支,加上佢覺得住耐咗覺得悶,所以都係決定返香港。

      刪除
    7. 我個女之前工作假期時打工係cover 到生活費, 因為只係返工所以有時間週圍去玩.
      之後讀書轉咗 visa 唔可以做咁多個鐘, 又搬咗屋租金貴咗就好緊, 所以除咗學費我地要俾之外唔想佢太慳去到東京都會留啲錢喺度.
      而家佢轉咗working visa 又唔駛返學又見返佢週圍去玩, 問佢錢方面佢話好好多.

      刪除
  6. 揀咗就忠於自己選擇,勇往直前。你哋幫佢打咗個好底,戥佢幸福。你哋又有理由成日飛過去嘞。

    回覆刪除
    回覆
    1. 好彩而家有廉航, 都算可以慳番啲.

      刪除
  7. 有得選擇沒有人會甘心離開自己土生土長的地方--好同意, 雖然唔捨得, 但香港...唉!

    回覆刪除
    回覆
    1. 香港越來越不濟, 淨係睇吓教育, 下一代既下一代可能已經唔知道乜叫民主乜叫公義, 完全冇自己既思想.

      刪除