2012年10月1日 星期一

宿泊

以前旅行訂酒店是一件頗麻煩的事, 要嘛經旅行社代辦, 又要按金又不是即時知道, 如果一些偏遠的地方旅行社沒有資料, 便得自己傳真過去, 有些更要用上日文聯絡, 遇上公司的傳真機不被私人應用, 便得托人幫忙傳送和接收, 非常麻煩.

自從開始可以在網上訂房, 一切都變得方便.


現在每次到日本, 如果那地方有 Super Hotel, 首選一定是 Super Hotel. 自從06年時經朋友介紹開始, 便覺得這酒店很適合我們一家. 因為全家都不喜好浸溫泉, 加上溫泉旅館通常都是一泊兩食, 對於地道的和式料理不是那麼啱口味, 如果沒吃留下好像不太好, 再說也是浪費食物, 同時房租也不便宜, 所以很少會選擇. 至於 Super Hotel, 由於有三人房和包早餐, 我家的習慣是如果不是返工返學的日子, 吃過早餐便可以連午餐也不用吃, 只是間中吃吃小食便可以到晚餐才吃, 夏天時通常會吃雪糕或是一些土產, 冬天便會吃熱騰騰的小食, 相對地三人房的租金也便宜, 而且服務態度絕不遜色在大酒店之下, 除了 check in 時間有限制外, 絕對是一間不錯的酒店.

講到 Super Hotel 不能不讚高山那間的職員, 記得10年冬天那次到達高山天已經全黑, 加上下著毛毛細雨, 氣溫應該只有2-3度左右, 坐在車內還有羽絨的我們尚且覺得寒氣逼人, 因為要泊車的緣故, check in 後有位女職員給了地圖講解完後便依地圖所示到停車場, 當時有位男職員正在服務另一客人, 但是兜了一圈也找不到所指示的地方, 只有折返再問, 那位女職員從新講解更在大門指示, 當回到車子的時候, 赫然見到那位男職員站在門口指示我們, 更跟著車子跑一路指示直至停車場門口, 那停車場距離酒店兩個街口有多, 當時他只是穿了一件裇衫, 連外套也沒有, 但外面著實很冷, 我們真是非常不好意思, 千Thank you萬ありがとう也表達不到我們的謝意. 還有巧合是去年到高山 Super Hotel 踫巧 check in 又是他, 當我表示需要停車時他竟然走了出來, 初時以為他又再次領我們去停車場, 正要對他說知道路線時, 原來他已預留酒店門外的車位, 再一次感謝這位先生.

住酒店很多人會在意房間有多大, 但是我反而不希望太大, 尤其不想有玄關又望不見門口那種.(以下經常一個人旅行住一間房的最好不看)

第一次到日本跟朋友住的溫泉酒店在富士山, 整晚風聲不絕, 雨打在窗前, 窗前的樹影搖搖擺擺, 好像有人招手, 雖然與人一起, 總覺得有莫名的恐怖感覺.

重返日本第一晚住的是池袋太子, 唔知點解成晚都覺得隔離房有講話聲, 回港後友人告知這酒店有"嗰啲野", 見我訂了就不便多說, 之後有好幾年都沒有再住, 直到兩三年前貪平貪方便又再住.

再次是博多的 Green Hotel, 住的是二人房加牀, 丈夫的牀對著門口, 半夜被他叫醒話門外好嘈, 要一齊開門看看, 但是甚麼也沒有, 整晚他似乎睡得不好, 翌日早上他將前一天由阿蘇行到草千里途中拍攝的石碑相剷除, 以後旅途見到的石碑也不會再拍攝.

另外是朋友的, 他一人旅行, 晚間朦朧中覺得有影坐在牀尾, 即大被朦頭, 有聲音在耳邊響起, "點解你詐諦見唔到".

7 則留言:

  1. 自從認識了 "樂天" 訂房網之後 , 每次去 "北海道" 都係經佢代訂房間 , 真係好方便架 .
    而我就至鍾意幫襯 "溫泉酒店" , 另外中午果餐 , 有時車殺得性起 , 真係可有可無架 , 最多到酒店 (晚餐) 食餐勁 .
    最後房間果D恐怖事件 , 大吉利是 ~ 我就未試過 , 每次都係一覺到天光 , 好彩 !
    [版主回覆10/02/2012 15:52:03]除咗 Super Hotel, 我都係用"樂天" 架, 貪佢介紹既房平同埋酒店都唔差, 今次層雲峽同屈斜路湖兩間個名氣都唔錯, 住嗰方面我無咩所謂, 最緊要有得沖涼 (唔係浸溫泉), 食就好多時兩餐儲埋一餐食, 中午太餓頂多食碗拉麵就算, 甚少食得好豪

    回覆刪除
  2. 我只去過日本一次,就是北海道那一次。
    我是要求團友的妹妹在網上訂房。不知道這樣訂房會不會貴了一些?
    [版主回覆10/06/2012 15:39:04]如果經 "樂天" 訂房網之類既網站訂應該唔會貴, 相反在酒店(出名貴嗰種)自己既網站就會貴, 因為好多時冇網站嗰啲折扣.

    回覆刪除
  3. 最初我都係用[樂天],跟住轉咗[Jalan].
    池袋有一間出名[猛]架...............
    [版主回覆10/08/2012 12:59:34]用開[樂天],又懶四圍格價, 下次都去[Jalan]睇吓
    , 我好想知邊間好[猛], 講唔講得?

    回覆刪除
  4. "點解你詐諦見唔到" -- 嘩, 好恐怖呀!!!!! 咁呢句係日文定係廣東話??
    [版主回覆10/09/2012 18:42:37]唔係日文, 因為唔係喺日本.佢聽得明, 應該係廣東話, 其實佢係一個成日會見到d 野既人, 見怪不怪.

    回覆刪除
  5. 我今次大部份住宿都係經 Jalan 訂的,多選擇之餘又可以儲分當錢駛。我地今次都有住 super hotel 呀,今次係第一次住 super,Ricky 仲一住就愛上左呢間商務酒店添 ! 以前多數住一般港人喜歡的東橫 Inn,但近年東橫 Inn 越來越貴,去到 7、8千日元一間房,但 super 5 千多就得,仲包埋早餐,有腸仔有蛋有沙律通粉,總好過東橫只得飯團
    [ck 鼠回覆11/05/2012 22:10:23]係 ? 有機會問下先,Thx~
    [版主回覆11/05/2012 21:48:59]佢地會俾一張咭可以給三個印. 每住一晚一個印, 儲齊三個下次 check in 時會俾1,000円 cash.
    [ck 鼠回覆11/05/2012 21:20:19]Super Hotel 有得給印仔3個換1,000円既咩 ?!
    [版主回覆11/05/2012 14:11:10]可能我家有信仰關係, 每次旅行都會帶著小小的十字架放在床頭給自己安心.
    [版主回覆11/05/2012 13:36:44]Super Hotel 真係好得, 今次池袋嗰間仲俾間大房我地, 除雙格床外多張梳化床, 擺野都多d 地方, 加上給印仔3個換1,000円仲開心.
    [ck 鼠回覆11/04/2012 18:15:32]恐怖事件好驚喎

    回覆刪除
  6. "以下經常一個人旅行住一間房的最好不看", 呢句你寫俾我睇架? 哈哈
    "點解你詐諦見唔到".隻日本鬼識講廣東話咁勁既
    [路過蜻蜓回覆05/24/2013 12:23:37]可能隻鬼見到我俾我嚇返轉頭, 哈哈
    [版主回覆05/24/2013 11:56:34]放心喎, 嗰件野唔係發生喺日本, 係d 東南亞國家, 嗰d 野通常都會用你明白既語言黎唬人

    回覆刪除
  7. 睇完你呢篇,我今次試試住SUPER。因為以後大多都三人行,我以前兩個人住慣果間APA HOTEL應該,要轉會。
    [版主回覆08/20/2013 13:15:29]一個普通身材既大人都應該瞓得落.
    [コーさん回覆08/19/2013 19:24:26]碌架床大人訓唔訓到? 我諗我自己訓上面。
    [版主回覆08/19/2013 13:34:34]Super Hotel 算得上經濟又企理, 不過話既三人房係碌架床, 小朋友太細唔係幾方便.

    回覆刪除