2016年11月22日 星期二

東京的家

很多時我們去日本都會笑稱是返鄉下, 但是鄉下都沒有一個固定的居所.

女兒去了日本也年半有多, 貯在居所的物品越來越多, 先前居住的是一般的劏房, 房間只有床, 書枱, 雪櫃仔, 廚房廁所是公用, 好處是所有東西全包, 房租也便宜, 不過比較狹窄, 而且因為是女子公寓, 我進去沒問題, 但是爸爸便不能踏足半步.

她在暑假回港時已透露新學期開始後便開始找地方, 希望可以換一間比較大的房間, 最近租下了一間好像叫 1DKL的, 即是有廚房廁所還連一間小閣樓可以放東西, 外貌很新的 Mansion, 雖然在東京23區外的埼玉, 不過返學返工有直通路線, 反而比之前住在池袋附近需要轉車方便, 而且所花時間更短, 雖然有冷暖氣, 不過沒有傢俬電器, 幸而她剛好有朋友的朋友離開東京, 廉價讓了傢電如雪櫃洗衣機微波爐等, 自己需要買的只有電視和多士爐.

以後我們到東京便有了個落腳的地方而再不需要租酒店., 雖然是比較遠了點, 但是感覺便好像回家, 因為有家人等待, 還有可以煮食, 常常覺得買餸煮飯的地方便有家的感覺, 唯一就是少了一個家庭成員茶々.

~~~ 所以一月去時可能只是宅在那裡忙這忙那幫手整理, 現在就是諗著去時怎樣帶些工具如鐵錘螺絲批等等上機, 因為需要爸爸幫她整理一些傢具, 可能最後都要買寄倉行李費.

13 則留言:

  1. 有廚廁比較方便呀,又似個家,鐵錘螺絲批要寄倉,寄倉行李費吾省得。

    回覆刪除
    回覆
    1. 有諗過去到買,但係始終唔識地頭,去 Tokyu Hands 嗰度買實貴又唔知好唔好用,始終自己用開嗰啲會習慣。

      刪除
    2. 帶架生入境會唔會被海關當你嚟爆格@@
      工具當然係日本貨最仔細啦, 秋葉原應該有五金舖, 你上網搵下

      刪除
    3. 日本仔係好,東京手嗰啲都好得,不過香港土炮平好多喎 ^^

      刪除
    4. 電批會喺日本買,至於螺絲釘真係要拎過去因為種類實在繁多。

      刪除
    5. 電批買 makita, 出名呀 :D

      刪除
    6. 知道,唔該晒 t 先生。

      刪除
  2. 我差d以為你地要為呀女在東京置業~不過你個女其實係咪想長期留日發展架

    回覆刪除
    回覆
    1. 置業唔會咯,不過想搬間住得比較舒服啲。
      其實如果有好路數既話我地唔會反對,因為對住而家香港既環境確實好灰 😟

      刪除
    2. 其實我同老公都諗緊~在香港努力搵錢然後去d物價低的地方退休...
      其實你地如果退休不如香港樓收租然後租日本樓住XD
      d錢肯定好洗過在香港..

      刪除
    3. 而家喺香港睇唔到前景,尤其係年輕人,寄人籬下雖然可悲但總好過見住香港一日一日沉淪落去,歪理變成真理的日子,莫講十年後一年後都唔知咩面貌,我地屋企既下一代而家喺外面可以既都唔會希望佢地返黎 😰

      刪除
  3. 兩頭住家,真高興!無男同學仔幫手裝傢俬?

    回覆刪除
    回覆
    1. 最高興係以後去東京唔駛訂酒店 ^^
      一言驚醒夢中人,佢話有個日本朋友幫忙,我完全冇諗過係男定女,好自然覺得係女仔XD

      刪除